Kapin walo ka tonelada sang basura ang nakuha sang City Environment and Natural Resources Office (CENRO) sa ila ginpatigayon nga clean-up ukon pagpaninlo sa collection point sa boundary sang Barangay Montinola, Magsaysay kag Our Lady of Lourdes sa distrito sang Jaro, Iloilo City.
Sa interview sang Bombo Radyo kay Engr. Niel Ravena, acting chief sang CENRO, iya ginpahayag nga gin-una nga gintinluan ang amo nga mga barangay bangud ang tagas sang basura ang diretso nga naga-ilig sa Dungon creek.
Ginatutokan sa monitoring suno sa natungdan ang Dungon creek bangud ini ang konektado sa Iloilo River.
Ginasigurado man suno sa iya ang kooperasyon sang mga barangay sa ila mga ginapatigayon nga clean-up activities.
