ILOILO CITY – Ginpasalig sang China ang European Union nga mabulig ini nga matapos na ang gyera sa Ukraine apang pabay-an sila sang ila mangin tikang.
Ini ang ginpahayag ni Chinese Premier Li Keqiang sa ginpatigayon nga virtual summit sang China kag European Union.
Suno naman kay Chinese President Xi Jinping, nagalaum siya nga i-konsiderar sang EU ang China nga independent bangud man sang mabaskog nga relasyon sang European countries sa United States.
Suno naman sa EU, indi dapat magbulig ang Beijing agud nga malampuwasan sang Moscow ang ginpataw nga sanction sang Western countries bangud sang nagapadayon nga Russian invasion sa Ukraine.
Suno kay European Council President Charles Michel, ginpanawagan niya ang China nga magbulig agud nga mauntat na ang kinagamo sa Ukraine.
Indi dapat nga magpabulag-bulag ang China suno kay Michel sa paglapas sang Russia sa international law.
Dugang pa ni Michel, mas mapadugay pa ang kinagamo sa tion nga buligan sang China ang ila kaalyado nga Russia.
Ang China ang nagatinguha nga magpatigayon sang energy, trade kag security ties sa Russia agud nga ipakita sa kalibutan nga masarangan nila ang Estados Unidos.
Apang gin-athag ni Chinese Premier Li Keqiang nga ang China ang nagatinguha nga magluntad ang kalinong sa Ukraine kag ginaduso ang negosasyon.
Suno naman kay Michel, ang duha ka bahin ang lunsay nagakabig nga pamahog sa global security kag global economy ang ginatawag sang Russia nga “special military operation” sa Ukraine.
Ang summit sa tunga sang China kag European Union ang ginpatigayon pagkatapos sang duha ka tuig humalin sang Dec. 30, 2020.
