ILOILO CITY – Nagpaandam si Presidente Rodrigo Duterte sa mga government agencies nga indi pagpabudlayan ang mga transaction sang mga overseas Filipino workers (OFWs).
Sa ginpatigayon nga groundbreaking ceremony sang Overseas Filipino Workers (OFW) Center sa Daang Hari, Las Piñas City, ginpahayag sang presidente nga indi niya gusto ang masami nga madugay nga proseso sang papeles sang mga migrant workers.
Gintawag man niya ang Anti- Red Tape Authority nga daw kaangay nga wala nagatungod sang ila obligasyon.
Suno sa presidente, nasakitan siya nga ginapasa-pasa ang mga OFW humalin sa National Bureau of Immigration tubtob sa Bureau of Internal Revenue (BIR).
Ginpahayag sang presidente nga naintindihan niya ang kabudlay sang mga migrant workers ilabi na ang naghalin sa mga probinsya kun sa diin, kinahanglan nila nga magbugtaw sang maaga kag magbyahe para lang magkuha sang mga dokumento sa mga opisina sang gobyerno.
Ginpaandaman niya ang mga government officials nga sundon ang iya mandu.
Ginhalimbawa sang presidente ang ginsipa sa pwesto nga anum ka cabinet members.
Ginpasalig man ni Duterte nga padayon ang suporta sang gobyerno sa mga OFWs ilabi na sa Ukraine, Middle East kag Afghanistan.
Ang OFW center sa Las Piñas City ang magaserbe nga one-stop shop nga magabutang sang satellite offices sang ahensya sang gobyerno nga makaproseso sang mga kinahangalanon sang mga OFWs.
