Halos balik na sa normal ang obserbasyon sang Semana Santa sa syudad kag probinsya sang Iloilo subong nga tuig apang nagapanawagan sa gihapon ang Simbahan sa mga tumuluo nga maghalong kag magsunod gid sa mga protocol.
Indi kaangay sang nagligad nga duha ka tuig, ginapahanugutan na subong ang 100% nga seating capacity sa simbahan para sa liturgical activities.
Sa interview sang Bombo Radyo kay Reverend Father Angelo Colada, director sang Social Communications sa Archdiocese of Jaro, iya ginpahayag nga nagbalik naman ang iban nga religious activities kaangay sang parish recollection, Visita Iglesia, Stations of the Cross ukon via crucis, kag prusisyon sa full capacity.
Ginapahanugutan na liwat ang sacrament of reconciliation ukon face-to-face nga pagkumpisar sa simbahan apang kinahanglan nga may suksok gid nga face mask.
Ang wala lang gintugutan amo ang pagtandog sa mga imahe kag paghalok sa mga krus bangud sa risgo sang paglaton sang Covid-19.
May mga aktibidad man nga nakasandig na sa diskresyon sang tagsa ka parokya. Halimbawa amo ang paghugas sang tiil. Halimbawa pa gid amo ang pagbisita sang mga apostoles sa mga puluy-an. May yara sang iban nga parokya nga naga-limita lang sa partisipasyon sang apostoles sa liturgical purposes, kag wala na nagapamalay-balay. Kun magpamalay-balay gid man, ginapanugyan nga likawan ang pagkaon sa mismo puluy-an.
Sa Byernes Santo, ginatugutan ang foot procession kag mobile convoy apang depende liwat sa parokya kun paano mapatigayon agud nga indi man magdis-uganay ang mga bata kag tigulang.
Sa Domingo de Ramos, personal naman nga makapadulong sa Simbahan ang tumuluo agud mabendisyunan ang dala nga lukay.
Wala ginarekomendar ang pagtipun-tipon sa plaza kun sa diin nakaandan kuntani nga yara ang imahe ni Kristo kag nagakanta ang mga bata.
Subong nga Lenten Season, yara na sa Alert Level One ang syudad sang Iloilo amo man ang iban nga mga banwa sa probinsya apang may iban pa nga mga lugar nga nagapabilin sa Alert Level Two. Bangud lain-lain ang restrictions sa idalom sang sini nga alert level status, nakasandig sa kura-paruko suno kay Colada kun paano ipatigayon ang mga aktibidad nga safe ang mga tawo.
