Gindayaw ni Chinese Ambassador to the Philippines Huang Xilian ang iya ginpahayag mas maayo nga relasyon sang Pilipinas kag China sa nagligad nga anum ka tuig.
Nagpahayag man ini nga kuntani mapadayon ang amo nga relasyon sa tunga sang duha ka pungsod apisar nga magatakop na ang administrasyon ni Presidente Rodrigo Duterte.
Sa isa ka photo exhibit nga gin-organisar sang Federation of Filipino-Chinese Chambers of Commerce and Industry Inc., ginpakita ang nangin proyekto sang China sa Pilipinas sang nagliligad nga mga tuig.
Suno sa Chinese ambassador, nagdoble pa ang trade sang duha ka pungsod kag apat ka pilo gid ang nangin investments sang China sa Pilipinas sa sulod man sang amo nga tion, ipaanggid sa nagligad nga anum ka tuig sa idalom sang lain nga administrasyon.
Matandaan nga sang 2016, nagpahayag si Duterte nga nagpromisa si Chinese President Xi Jinping sang investments kag loan pledge sa Pilipinas sa kabug-usan nga balor nga $24 billion ukon P1.26 trillion.
Apang sandig sa nangin report sang Bloomberg sang 2021, wala pa nahatag sang China ini nga billions apisar nga malapit si Duterte sa amo nga nasyon. Suno pa sa report, kalabanan sang big-ticket projects sa Pilipinas nga ginpondohan sang China ang nagakinahanglan pa lang sang approval. ##
