Gintudlo sang isa ka tagreklamo nga ang quarry operation sang banwa sang Maasin, Iloilo nga ginpahanugutan ni Mayor Francisco ‘Ansing’ Amboy ang rason kun ngaa nagdalum ang suba sa Barangay Caigon kun sa diin nalumos kag napatay ang duha ka bata kahapon.
Sa interview sang Bombo Radyo sa tagreklamo nga si Ronel Florentino, himata sang 7-anyos kag 6-anyos nga babayi nga magpakaisa nga napatay, iya ginpahayag nga bangud sa quarrying, naguba na ang suba kag nangin delikado para sa mga residente sang ila nga barangay.
Pahayag sini, sang nagligad nga tuig, may meeting nga ginpatawag sa barangay kag ginkuha ang ila nga sentimyento kaangot sa patigayunon nga quarrying.
Sa alegasyon ni Florentino, wala sila nagpasugot apang ginpadayon gid sang local government unit (LGU) ang operasyon.
Gin-athag man sini nga wala man siya nangisog nga magreklamo kun wala man sang kabuhi nga nautas bangud sa amo nga aktibidad.
SABAT SANG ALKALDE
Gintawag naman ni Amboy nga troll si Florentino kag nagapamulitika.
Suno kay Amboy, nakadangop na siya sa National Bureau of Investigation (NBI) agud imbestigaran si Florentino bangud may mga daan na ini nga isyu nga nagatum-ok sa alkalde.
Pahayag pa ni Amboy, ginpadulungan sang Municipal Disaster Risk Reduction and Management Office (MDRRMO) ang lugar kun sa diin nalumos ang duha ka bata.
Sa report sang MDRRMO, tuman ini ka layo sa quarry site nga ginakuhaan sang LGU sang balas nga ginapadala sa iban nga mga barangay sa Maasin.
Ginpahayag sang alkalde nga pulitika lang ang rason kun ngaa may amo sini nga reklamo si Florentino kag maabot gid ang tyempo suno sa iya nga pasabton ini bangud naga-imbestigar na ang NBI.
Dugang pa sini, bugaon ang lugar nga ginatudlo ni Florentino — dalipi ukon malum-ok ang duta kag indi pwede nga nga i-quarry.
‘Gahuro-huro gid sya sa pagtum-ok sa akon. Tani mangin tampad siya, indi ya paglaktan sang pulitika. Ginapa-imbestigaran ko na ang tawo nga ini,” suno kay Amboy.
Nagpasalig man ang alkalde sang bulig sa pamilya sang magpakaisa nga babayi nga napatay bangud sa pagkalumos. ##
