Maga-umpisa na buwas, Abril 27, ang pagsirado sang dalan kag re-routing scheme sa palibot sang Lapaz Public Market.
Kaangot ini sa pagsugod naman sang construction kag improvement sa nasambit nga merkado.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga may resolution na nga ipaguwa subong nga adlaw kaangot sa re-routing scheme nga una nga ginpahayag nga magalawig sang duha ka tuig.
Umpisa buwas nga adlaw, may tukuron na nga mga kiosko sa Rizal Street kun sa diin temporaryo nga ipahamtang ang apektado nga mga market vendors.
Ang indi apektado amo ang mga nagabaligya sa meat and fish section.
Umpisa naman subong nga Martes, may yara na sang no-parking nga pagsulundan sa Arroyo kag Huervana Streets kun sa diin apektado sini ang mga driver sang tricycle kag mga sikad.
Yari ang una nga ginplastar nga road closure kag re-routing scheme nga suno kay Conlu, amat amat nga ipatuman umpisa sa buwas nga adlaw:
Wala sang pagbag-o sa ruta sang mga salakyan nga magahalin sa Jaro district kag padulong sa Iloilo City proper.
Apang kun halin naman sa Iloilo City Proper kag padulong sa Jaro district, nagakadapat nga maga-diretso na sa Luna Street, La Paz kag indi na magliko sa Lapaz Market.
Kun mapadulong naman sa La Paz nga halin sa Iloilo Hall of Justice, mahimo mag-right turn kag diretso sa Huervana Street tubtub sa La Paz plaza.
Sa mga nagalabay naman sa likod sang Iloilo Provincial Capitol, mahimo mag-right turn tubtub sa La Paz plaza.
Kun mapa-St. Clements naman, ma left turn sa Mabini Street, left turn sa Burgos Street, kag pabalik sa Luna Street La Paz.
Kun halin naman sa La Paz plaza kag padulong sa padulong sa Jaro Plaza, indi mahimo mag-right turn sa atubang sang La Paz Market sa baylo ma-left turn sa Rizal Street.
Sa mga magapadulong naman sa Iloilo River Esplanade, nagakadapat nga maglabay sa Mabini, kag ma-left turn sa Burgos.
