ILOILO CITY – Nag-file sang motion for reconsideration ang “Pudno Nga Ilokano” ukon “Ang Totoong Ilokano” angut sa ginbasura nga disqualification case batuk kay former Senator Ferdinand Marcos, Jr.
Ginbasura sang First Division ang disqualification case batuk kay Marcos bangud sa kakulangan sa ebidensya.
Suno sa petitioner, ang pagpamalibad nga magbayad sang income tax ang hungod nga paglapas sang layi.
Sa amo nga motion, gin-insister sang petitioners nga convicted si Bongbong Marcos sang krimen nga may penalidad nga tatlo ka tuig kag dapat nga diskwalipikado ini nga magpadalagan kag magkapot sang public office.
Ang petitioners sa disqualification case ang ginabug-usan nanday Margarita Salonga Salandanan, Crisanto Ducusin Palabay, Mario Flores Ben, Danilo Austria Consumido, Raoul Hafalla Tividad, Nida Mallare Gatchallan, kag Nomer Calulot Kuan.
Suno sa grupo, si Marcos ang convicted sang makawalo ka beses sa Quezon City Regional Trial Court Branch 105 sang 1995 bangud sa kapaslawan nga mag-file sang income tax return bilang gobernador sang Ilocos Norte para sa taxable year nga 1982 tubtob 1985 kag bangud sa kapaslawan nga magbayad sang corresponding deficiency taxes.
