Gin-ako na ni Presidente Rodrigo Duterte nga nagsala lang siya sa iya promisa nga tapnaon niya ang iligal nga droga sa Pilipinas sa sulod sang tatlo tubtub anum ka bulan sa pagsugod sang iya nga administrasyon.
Isa ini sa pinakasikat nga campaign promise ni Duterte sang 2016. Suno sa presidente, campaign time sang ginhimo niya ang amo nga promisa, apang pag-abot sa Manila, natukiban sini nga anum ka mga heneral nga yara mismo sa Philippine National Police (PNP) ang may kahilabtanan sa amo nga hilikuton.
Matandaan nga sang Septyembre 2016, tatlo ka bulan matapos nakapungko si Duterte, nagpangayo ini sang anum ka bulan nga extension sa deadline nga siya man mismo ang naghatag sa iya kaugalingon.
Pagkatapos, ginpahayag na sini nga endemic ang problema sa illegal drugs sa Pilipinas kag ginpangako na lang sini nga papason ang problema tubtub sa katapusan sang iya nga termino. Ang war-on-drugs sang Duterte Administration ang nangin tuman ka kontrobersyal bangud sa ginapahayag extra-judicial killings.
Sa iya speech sa inauguration sang Cebu-Cordova Link Expressway (CCLEX) Project sa Cordova, Cebu, nagpanawagan man ang presidente sa New People’s Army (NPA) nga mag-surrender.
“Kayong mga NPA, kayong mga durugista, you want peace? Magtrabaho ka lang then drop the gun. Kayong mga durugista drop the drugs, itapon mo yan at wala ka talagang problema sa akin,” suno kay Duterte. ##
