Nakaabot na sa syudad sang Iloilo ang official ballots nga amo ang gamiton sa nagahilapit nga May 2022 national and local elections.
Sa interview sang Bombo Radyo kay Mr. Jonathan Sayno, Election Assistant II sa COMELEC-Iloilo City, iya ginpahayag nga ginabutang subong ang boxes sang official ballots sa City Comelec Bodega sa distrito sang Molo.
Bastante ini nga mga balota para sa 330,470 ka registered voters sa syudad.
Gin-athag ni Sayno nga indi pwede mabuksan ang mga balota kag indi ma-check kun may yara sang pre-shaded ballots kaangay sang gina-reklamo sang iban nga mga botante.
Apang panugyan sini sa publiko, antes magbaton sang balota sa Mayo 9, dapat siguraduhon gid nga wala ini na-shade kag indi pagbatunon kun pre-shaded.
Magluwas sa official ballots, yari naman sa syudad ang vote counting machines (VCMs) apang buksan lamang kun may yara na sang electoral boards sa mismo final testing and sealing day.
Sa Mayo 7, gina-imbitar ang mga party watchers ukon representatives sang political bets kag parties kag amo man ang National Citizens’ Movement for Free Elections ukon NAMFREL nga magsaksi sa final testing and sealing sang machines.
Dulungan nga patigayunon ang final testing and sealing sa syudad kag probinsya sang Iloilo. Sa final sealing and testing, pwede mahimo sang participant nga mag-undervote, mag-overvote, mag-shade sang sala-sala, butangan sang lain nga kuris, ukon gision ang balota agud nga ma-check kun batunon ini sang VCMs.
Importante ini nga proseso bangud suno sa Comelec, ginaduso gid subong ang malimpyo kag tampad nga sahi sang eleksyon. ##
