ILOILO CITY – Nagalaum si Senator Leila De Lima nga magwa ang kamatuoran at isa-isa nga mag-ako ang tanan nga nagtestigo batuk sa iya.
Ini ang reaksiyon sang senadora matapos nga ginbawi sang self-confessed drug lord nga si Kerwin Espinosa ang tanan nga alegasyon sini batuk sa iya.
Para kay De Lima nga lima na ka tuig nga napreso sa Camp Crame bangud sang mga kaso nga may kaangtanan sa iligal nga droga, pamatuod gid lamang nga ang pagbaliktad ni Espinosa ang himu-himo lang ni Presidente Rodrigo Duterte kag sang iya mga alagad ang tanan nga testimoniya kag ebidensya batuk sa iya agud nga makatimalos.
Si De Lima ang nagpamuno sa imbestogasyon sang senado sa kontrobersyal nga drug war ni Duterte kag ang ginpahayag nga “death squad killings” sa Davao City sang secreatry sang Department of Justice (DOJ) ang senadora.
Ginpahayag dugang sang senadora nga gingamit lamang sang DOJ si Espinosa kag ang iban pa nga sentinsyado nga kriminal agud nga maghimo sang mga kabutigan at krimen nga wala niya nahimo.
Nagalaum man siya nga mas mas madamo pagid sang witness ang maggwa kag panghingadlan kun sin-o ang yara sa likod sang frame up agud nga manabat ang mga ini.
Ginatun-an na sang kampo ni De Lima ang pagpasaka sang kaso sa tanan nga may kahilabtanan apang wala pa sang may ginhingadlan si Espinosa kag indi man matumod sang iya mga abogado kun bala kabahin diri si anay Justice Secretary Vitaliano Aguirre nga una na nga nagpahayag nga ulamiron ni Espinosa si De Lima sa pagbaligya sang iligal nga droga.
