Wala nadayon ang indignation rally sa Concepcion, Iloilo agud nga pakamalauton ang ginaalegar pagpamahog batok sa isa ka punong barangay sa amo nga banwa kag ang ginapahayag pagpabaya sang police station batok sa sini nga reklamo.
Sa interview sang Bombo Radyo kay Atty. Ariel Manipula, nagatindog nga legal counsel ni Punong Barangay Nestor Malejona sang Barangay Aglosong sa amo nga banwa, iya ginpahayag nga ini bangud wala gin-aprubahan ni Mayor Raul Banias ang ila application para magkuha sang permit sa amo nga rally.
Suno kay Manipula, ginrason ni Banias nga magatuga lang sang trapiko ang amo nga rally.
Nahibaluan nga ginreklamo ni Malejona ang ginaalegar pagpamahog nga ginhimo sang isa ka grupo sang mga lalaki nga ginatudlo nga tinawo ni Mayor Banias nga nagpadulong sa lugar bangud sa ginapahayag nagakatabo nga vote buying.
Una na gin-athag ni Malejona nga sang amo nga tion, naga-conduct lang ini sang briefing sa iya nga mga barangay tanod kag sang nangayo sang assistance sa Concepcion Municipal Police Station, gin-alegar ni Malejona nga wala man sila ginsapak rason nga ang Sara Municipal Police Station ang ila ginpakig-angutan kag nagresponde.
Nag-file na sang panumbungon sanday Manipula sa Municipal Court sa San Dionisio batok sa pito ka tawo bangud ginapahayag nga naga-alang alang man ang mga pulis nga sila mismo ang mag-file sang complaint.
Nagsabat naman si Concepcion, Iloilo Mayor Raul Banias sa akusasyon ni Manipula kag nagsiling nga pagpangguba lang ang ginahimo sini bangud nga utod sang abogado ang asawa ni Concepcion Vice Mayor Millard Villanueva.
Sanday Villanueva kag Banias ang nagakontrahanay sa pagka-alkalde sang banwa.
Nanindugan man si Banias nga wala gid ini nagapatigayon sang vote-buying nga amo ang isyu ang ginahaboy batok sa iya.
Sa bahin ni Villanueva, hugot man sini nga ginpanginwala nga nagapamakal ini sang boto.
