Nagaplano ang mga transport groups sa syudad sang Iloilo nga maga-file sang petition agud pasakaan ang plete sa jeep.
Ini ang kasunod sang big-time oil price hike epektibo sang Martes, Mayo 10, kun sa diin ang diesel kag gasolina ang nagsaka sang P4. 20 kada litro.
Sa interview naman sang Bombo Radyo kay Mr. Raymundo ‘Boyet’ Parcon, presidente sang Iloilo City Loop Alliance of Jeepney Operators and Drivers Association (ICLAJODA) kag chairman sang Western Visayas Transport Cooperative, iya ginpahayag nga sa inisyal nga plano, P5.00 ang ipasaka sa plete.
Himuon nga P15.00 ang minimum nga transportation fare.
Suno kay Parcon, ini na ang nakasugtan sang mga transport leaders bangud indi na gid mabatuan ang masobra kuatro pesos nga saka, apang senintimos lang ang buhin kun may ipatuman nga rollback.
Suno pa sa natungdan, apektado man pati ang mga driver sang modernized jeepneys bangud mas dako ang ma-konsumo nga krudo.
Kun makasapol na ang transport groups kag cooperatives sa masunod nga semana, ipasaka ang petition sa Department of Transportation (DOTr).
