ILOILO CITY – Nag-upod sa anti-government protesters ang nagapanguna nga opposition party sa Sri-Lanka sa pagbasura sang appointement sang bag-o nga prime minister kag gin-insister nga magpanaog sa pwesto ang presidente kag tungdan ang economic crisis sang pungsod.
Gin-appoint ni President Gotabaya Rajapaksa si five-time prime minister Ranil Wickremesinghe para sa iya ika-anum nga term nga ginkontra naman sang oposisyon kag ginpahayag nga indi makasolbar sang political kag economic crisis sang pungsod.
Nagdangat na sa siyam ang nagkalamatay kag masobra 300 ang nagkalapilasan sa halos isa na ka semana nga protesta sa bilog nga pungsod.
Ang utod sang presidente nga si Mahinda Rajapaksa ang nag-resign bilang prime minister kag nagapanago sa isa ka military base.
Ang iban naman nga myembro sang gabinete ang una na nga nag-resign.
Suno kay Eran Wickramaratne, parliamentarian kag senior member sang main opposition party nga Samagi Jana Balawegaya, ang bag-o nga prime minister ang kontrolado sang presidente kag kinahanglan sang pungsod nga magbalik na si Rajapaksas.
Suno naman sa Indian High Commission sa Colombo, nagapadayon ang pagsinapol agud nga mabalik na economic recovery and stability sang Sri Lanka pinaagi sa democratic processes.
