ILOILO CITY – Ginpahalugan na sang Indonesian government ang COVID-19 restrictions bangud sa naganubo nga kaso sang virus sa pungsod.
Suno kay Bombo International Correspondent Ginavella Limpin- Cumla direkta sa Jakarta, Indonesia, gin-anunsiyo ni Indonesian President Joko Widodo nga indi na kinahanglan ang negatibo nga COVID-19 test sa mga bakunado nga tawo nga magasulod sa pungsod.
Ang pag-lift sang mga restrictions ang epektibo subong nga adlaw, Mayo 8.
Ang mga tawo nga yara sa outdoor places kag indi madamo ang tawo ang indi na kinahanglan nga magsuksok sang face mask samtang sa indoor spaces kag sa public transportation, kinahanglan gid nga magsuksok sang face mask.
Ang Indonesia ang sa karon naga-record nalang sang 200 tubtob 400 ka daily COVID-19 cases nga tuman ka layo sang Marso kun sa diin, linibo ang kaso sang COVID-19 nga ma-record sa isa ka adlaw.
Nagdangat na sa masobra anum ka milyon ka tawo sa Indonesia ang nagpositibo sa COVID-19 humalin sang nagsugod ang pandemya nga nagpatay sang masobra 156, 000 ka mga tawo.
166 million naman sa 270 million nga populasyon ang fully vaccinated.
Apisar sang mga paghalog, nagpaandam ang Indonesian government nga mangin vigilante sa gihapon.
