ILOILO CITY – Wala sang plano nga mangin Senate President si incumbent senator kag utod ni presumptive president Ferdinand ‘Bongbong’ Marcos Jr. nga si senator Imee Marcos.
Ini ang ginpahayag ni senator Sonny Angara.
Suno kay Angara, ang chairmanship sang finance committee ang gina-target ni Marcos nga amo ang komitiba nga iya ginapamunuan subong.
Gin-ako ni Angara nga mahimo nga mapilitan si Sen. Imee bangud sang suporta sang mga kaupdanan sa senado bangud man sang eksperyensya sini bilang mamalidha kag utod pa siya sang presumptive president.
Apang suno kay Angara, ang iya suporta ang ihatag niya kay reelectionist Senator Juan Miguel Zubiri.
Ginpahayag man ni Angara nga sigurado na ang suporta nila kay Zubiri upod sa iya mga seatmates nga sanday Sen. Nancy Binay, Sen. Joel Villanueva, kag Sen. Grace Poe.
Nagalaum naman si Angara nga maistoryahan nanday Zubiri kag Villar ang posible nga pagkontrahanay sa pwesto nga bayaan ni Senate President Vicente ‘Tito’ Sotto III.
Gin-athag man ni Angara nga indi mangin “rubberstamp” sang bag-o nga administrasyon ang Senado apisar nga may yara na ini liwat sang super majority.
