Sa una nga war crimes trial halin sang gin-atake sang Russia ang Ukraine, nag-atubang kag nag-ako ang 21-anyos nga Russian soldier sa pagpatay sa isa ka 62-anyos nga sibilyan.
Ang non-commissioned officer amo si Vadim Shishimarin, myembro sang Russian tank unit, kag posible silutan sang bilog nga kabuhi nga pagkabilanggo.
Gin-ako sini ang pagluthang sa 62 anyos nga indi armado nga Ukrainian sa northeastern Sumy region sang bag-o pa lang nag-umpisa ang Russian invasion.
Sang nag-plead guilty si Shishimarin sa amo nga krimen, yara mismo ang asawa sang sibilyan nga iya ginpatay.
Gin-prosecute si Shishimarin sa idalom sang section sang Ukrainian criminal code nga naga-address sang laws and customs sang gyera.
Una na nga ginpahayag ni Ukrainian Prosecutor General Iryna Venediktova nga ginahanda na ang war crimes cases batok sa 41 Russian soldiers sa sala nga nagalakip sang pagpamomba sa mga civilian infrastructure, pagpatay sa mga sibilyan, pagpang-rape, kag pagpangawat.
Indi pa subong maathag kun pila na sa mga Russian soldiers ang nadakpan.
Ginasundan ang kaso ni Shishimarin bangud nagakolekta ang mga imbestigador sang ebidensya sang ginapahayag natabo nga war crimes agud madala mismo sa International Criminal Court sa The Hague.
Ginapahayag nga 10,700 potential war crimes ang ginasundan kag masobra 600 ang suspects lakip na ang Russian soldiers kag government officials.
