ILOILO CITY – Dapat nga malampuwasan anay sang mga contenders sang senate president ang isyu sang committee chairmanship nga ihatag sa mga senador nga magaboto sa ila.
Ang duha ka mga pangalan nga nagagwa kag nagapangibabaw nga amo ang masunod nga senate president amo sanday Juan Miguel Zubiri kag Cynthia Villar.
Suno kay Minority Leader Franklin Drilon, ang pagpamuno sang komitiba ang wala lamang nagapataas sang status sang isa ka mamalidha kundi makabulig man sa senador bilang pinuno sang komitiba agud nga iduso ang iya personal nga agenda ukon adbokasiya.
Tradisyon sa senado nga gina una ang mga madugay na sa senado kag ang mga nagabalik kun paghatag sang committee chairmanship ang istoryahan.
Dugang pa ni Drlion, ang mga bag-o nga mga myembro ang masami nga ginahatagan sang minor committees.
Sa 18th Congress, gintunga sang senate president ang education committee agud nga mahatagan sang tsansa sanday senator Sherwin Gatchalian kag Joel Villanueva nga iduso ang ila nga adbokasiya sa mga pamatan-on.
Suno sa report, ang mga incoming senators ang nagahingyo nga amo man sa gihapon ang komitiba nga ila nga kaptan.
Ang finance committee nga ginapamunuan ni Senator Sonny Angara ang gina-target sang anay head nga si Senator-elect Loren Legarda magluwas pa kay Senator Imee Marcos.
Si Senator Cynthia Villar ang magapamuno sang environment panel, nga amo ang adbokasiya ni Legarda.
Gina-agawan man ang education committee dugangan pa sang pagbalik sang former head nga si Senator-elect Chiz Escudero.
Nagpahayag naman sang interes si Senator-elect JV Ejercito nga ipadayon ang iya health advocacies.
Si Senator Christopher “Bong” Go amo ang chair sang committee on health.
Ang labor committe nga ginapamunuan ni Senator Joel Villanueva ang gina-target ni Senator Raffy Tulfo lakip na ang civil service panel nga ginapamunuan ni Senator Ramon “Bong” Revilla, Jr.
Sanday Ejercito kag Senator-elect Mark Villar ang naga-target sang public works committee.
Suno naman sa kampo ni Zubiri, ginaduso nila ang “equity of the incumbent” bilang respeto ss senior members sang senado.
Nahibaluan nga mismo sanday Drilon kag Senate President Vicente Sotto III ang nagpahayag nga indi kinahanglan sang isa ka senador nga mangin chair ang isa ka komitiba agud nga mangin epektibo nga mamalidha.
Suno kay Drilon, ano man ang background ukon expertise, ang bisan sin-o nga senador ang mangin committee chair kun ang majority na ang ma desisyon.
Apang suno kay Sotto, kinahanglan ang expertise kag background sang magapamuno sang sensitibo nga komitiba kaangay sang national defense kag constitutional amendments nga gina-target ni Senator-elect Robin Padilla.
Suno naman kay Senator Sonny Angara, matuod nga ang committee chairmanship ang liwat nga nangin seryoso nga butang, mahimo nga maresolbar ini sang mga senador sa isa ka malinong nga pamaagi.
