ILOILO CITY – Nagpadulong si US President Joe Biden sa South Korea agud nga magsapol sa regional security allies bangud sa kahangawa nga magsangkad pa ang nuclear test sang North Korea.
Ini ang labing una nga Asia trip ni Biden umpisa sang nangin US leader ini.
Ginbaton siya sang pro-US South Korean President Yoon Suk-yeol nga nagpungko sang nagligad gid lamang nga semana apang may yara sang dako nga kahangawa bangud ginapahayag nga magapatigayon sang nuclear test ang North Korea kadungan sang pagbisita niya sa rehiyon.
Suno sa South Korean lawmaker nga si Ha Tae-keung, apisar sang COVID outbreak, nakumpleto na ang preparasyon sang Pyongyang para sa nuclear test kag nagahulat gid lamang sang maayo nga tiyempo.
Suno naman kay US National Security Advisor Jake Sullivan, aminado sila nga may yara sang dako nga risgo sa ila pagpadulong sa rehiyon apang nagpakig-angot na sila sa mga kaalyado lakip na sa China.
Tinutuyo sang presidente sang SoKor nga maka-angkon sang mas mabaskog nga koneksyon sa US lakip na ang joint military exercises.
Pagkatapos sang pagbisita sa South Korea, sunod nga kadtuan ni Biden ang Japan agud nga magsapol upod ang lideres sang duha ka pungsod kag subong man pag-upod sa regional summit sang Quad.
Ang Quad ang ginabug-usan sang Australia, India, Japan kag Estados Unidos.
Apang, ang pagbisita ni Biden sa duha ka pungsod ang ginsugata sang kontrobersiya matapos nga ginpapauli sa Estados Unidos ang duha ka Secret Service agents bangud nga ginkastigo ang isa ka South Korean bangud sang kahulugbon, isa ka adlaw antes ang pag-abot sang presidente sa Seoul.
