Anum gid ka tawo ang pilason matapos nga ginpang-buno sang hubog nga lalaki sa Tinagong Dagat Beach Resort sa Brgy. Baras, Guimbal, Iloilo.
Ang mga biktima amo sanday Jeffry Enoja, 34; Jansen Consumo, 40; Oliver Enoja, 22; Julio Enoja Jr, 21; Jepy Camada, 36; kag Ronaldo Enoja, 27.
Ini nga mga biktima ang lunsay residente sang Barangay Quipot, Janiuay, Iloilo.
Ang suspek naman amo si Dante Alemania, 30, residente sang sang Brgy. Kinaspan, Alimodian. Sa interview sang Bombo Radyo kay Pol. Lt. Felice Dioso, officer-in-charge sang Guimbal Municipal Police Station, iya ginpahayag nga naga-videoke ang mga biktima sa isa ka cottage kag nag-impon lang ang hubog nga suspek.
Ginpahayag ni Dioso nga wala na sang madamo nga baisay pa bangud kag diretso na nga nagpamuno si Alemania gamit ang kutsilyo.
Gilayon man ini nga naaresto sang mga pulis.
Sa anum ka mga biktima, tatlo ang out-patients sa ospital. Si Julio Enoja, Jr. ang iga-refer sa ospital sa Iloilo bangud sa pilas sini sa tiyan. ##
