Ginkilala sa Japan ang isa ka Pinoy matapos ang dalayawon nga pagsalbar sini sa isa ka Japanese national nga nagtuyo kuntani nga maghikog.
Ang Pinoy amo si Emil Reboja Vega, 32, residente sang Albuera, Leyte, kag naga-trabaho bilang plumber sa Asaka City, Saitama Prefecture sa Japan.
Sang Abril 24, samtang nagapauli halin sa trabaho si Vega, naagyan sini ang isa ka babayi nga nagahana nga maglumpat sa taytay.
Wala na nagduha-duha si Vega kag nanaog sa iya nga motorsiklo, gin-uyatan ang kamot sang babayi, nagpangayo sang bulig, kag sang ulihi, nagtawag sang pulis.
Suno kay Bombo International Correspondent Josel Palma direkta sa Japan, bangud sa ginhimo sang Pinoy, naghatag sang award si Asaka City Police Commissioner Chief Police Inspector Makoto Sato.
Nagbaton si Vega sang certificate sa isa ka seremonya nga ginpatigayon sang local authorities.
