ILOILO CITY- Indi magnubo sa 50 ka mga mangunguma ang halos dululungan nga ginpamatay sanga mga militante sa Nigeria.
Suno kay Bombo International Correspondent Reymond Epakta direkta sa Nigeria, natabo ang makangiridlis nga pagmasaker sa mga biktima sa banwa sang Rann sa estado sang Borno nga makit-an malapit sa border sang Cameroon.
Ginpahayag ni Epakta nga yara sa ila ginatalauma nga duta ang mga biktima sang ginpalibutan ang mga ini sang mga armado nga kalalakihan, gin-hostage kag brutal nga ginpamatay.
Suno kay Epakta, ang militante nga Islamist group nga Boko Haram ang may kahimuan sang nasambit nga krimen.
Umpisa sang 2009, naputos na sang insurhensiya nga kahimuan sang Boko Haram ang nasambit nga bahin sang Nigeria kag pila ka milyon na ang nagbiya kag yara sa 350,000 ka tawo na ang napatay bangud sa pagpang-atake sang militante nga grupo.
