Gin-ako sang pulis nga nadakpan sa drug buy bust operation sa Brgy. North Fundidor Molo, Iloilo City nga sa New Bilibid Prison ang ginahalinan sang iligal nga droga nga iya ginabaligya diri sa syudad sang Iloilo.
Matandaan nga ang gin-aresto sang Domingo, Mayo 22, amo si Police Staff Sergeant Igmedio Cristobal, Jr., 40, residente sang Brgy. Jereos, Lapaz, kag assigned sa Regional Election Monitoring and Action Center sa Police Regional Office (PRO) VI.
Nakuha sa possession ni Cristobal ang masobra P374,000 nga balor sang ginapatihan iligal nga droga.
Sa interview sang Bombo Radyo kay Pol. Lt. Col. Mark Anthony Darroca, head sang Regional Police Drug Enforcement Unit, iya ginpahayag nga lunsay man bag-o nga mga personalidad ang ginpangmensyonar ni Cristobal kag may yara man nga taga-probinsya sang Iloilo.
May yara man sang namensyonar nga manggaranon suno kay Darroca.
Suno pa sa natungdan, 2018 pa lang, na-monitor na nga nagagamit kag naga-distribute sang iligal nga droga si Cristobal apang madanlog dakpon bangud nakahibalo ini sa operasyon sang pulis.
Gindayaw naman sang Police Regional Office VI ang panikasog sang Regional Police Drug Enforcement Unit nga dakpon ang kaangay man nila nga pulis.
Sa interview sang Bombo Radyo kay Pol. Lt. Col. Arnel Solis, spokesperson sang PRO- VI, iya ginpahayag nga ginapreparar na subong ang kaso-administratibo nga ipasaka batok kay Cristobal agud nga i-dismiss ini sa serbisyo.
Ang kaso-kriminal ang una naman nga nahikot kag napasaka na batok sa naaresto nga pulis. ##
