Ginpasalig sang MORE Electric and Power Corporation (MORE Power) nga indi sini pagpabayaan ang syudad sang Iloilo subong nga nagdaku na gid ang tyansa nga ma-expand ang ila nga franchise area kag masulod ang 15 ka mga banwa kag component city sa probinsya sang Iloilo.
Ini matapos ginpasar na sa senado sa third and final reading ang House Bill 10306, ang hagna nga ginduso agud nga pasangkaron pa ang franchise area sang MORE Power tubtub sa segundo kag kuwarto distrito sa Iloilo Province.
Sa interview sang Bombo Radyo kay Atty. Allana Mae Babayen-on, legal counsel sang MORE Power, iya ginpahayag nga padayon sila sa proyekto, serbisyo, kag rehabilitation sa syudad sang Iloilo bangud nga mandato ini sang MORE Power sa idalom sang layi.
Masulusobra pa lang duha ka tuig nga naga-serbisyo ang MORE power bilang naga-isahanon nga power distribution utility sa syudad, apang suno kay Babayen-on, lauman nga wala sang mangin pagbag-o sa management kag rehabilitation sang sistema para sa mga myembro-konsumidor.
Ini man ang rason suno sa iya nga may yara sang scheduled power interruptions sa syudad bangud sa mga maintenance works nga kabahin pa sang 5-year development plan nga nagatuyo nga pauswagon gid ang distribution facilities sa Iloilo City.
PLANO PARA SA PROBINSYA
Ginalauman nga mapirmahan na ni Presidente Rodrigo Duterte ang amo nga hagna antes ini manaog sa pwesto sa Hunyo 30, 2022.
Apang kun mahimo na ini nga layi, indi man insigida suno kay Babayen-on nga magahatag na sang serbisyo ang MORE Power sa mga banwa.
Posible suno sa natungdan nga matuigan pa antes makaumpisa ang MORE Power, kag lima tubtub pulo ka tuig nga malikop ang mga banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Dueñas, Dumangas, San Enrique, kag component city sang Passi.
Suno kay Babayen-on, indi man mahap-an ang tanan nga ulubrahon, apang ginpasalig man sini nga todo na ang preparasyon.
Bisan sang yara pa lang sa Kamara ang hagna, ginpahayag nga may preparatory works na ang MORE Power, may ocular inspection, kag may ginpatigayon nga mga pagtuon agud nga indi mapaslaw ang mga tawo sa ila ginalauman nga serbisyo.
Sa concern naman sang pila ka mga konsumidor nga basi kun bawion sang MORE Power ang ila nga kapital nga gingamit sa investment kag pamahalan ang sukot sa kuryente, ginpahayag ni Babayen-on nga may mga forecast na nga ginhimo kag gintun-an sang maayo agud tanan nga benepisyo, magasentro gid sa konsumidor.
Una na nga ginpasalig ni MORE Power president kag COO Roel Castro nga indi pagbuslan ukon pag-i-take over sang MORE Power ang Iloilo Electric Cooperative (ILECO) nga amo subong ang power distributor sa probinsya.
Co-existence ang matabo — buot silingon, depende gihapon sa myembro-konsumidor kun MORE Power ukon ILECO ang ila pilion nga electric power distributor. ##(Photo: MORE Power Iloilo/FB)
