ILOILO CITY – Ginkumpirmar sang Department of Foreign Affairs (DFA) nga ginpatawag sini ang isa ka senior official sang Chinese Embassy sa Manila agud nga magprotesta bangud sang “harassment” sang Chinese Coast Guard sa isa ka Philippine vessel nga na-engage sa isa ka research activity sa West Philippine Sea.
Sa ginpagwa nga statement sang DFA, gina-review na ang impormasyon sa pinakaulihi nga insidente sa gina-agawan nga teritoryo para nga mag-file sang diplomatic action.
Ginpagwa sang DFA ang statement matapos nga gin-report sang Washington-based Asia Maritime Transparency Initiative (AMTI) nga gin-harass sang Chinese Coast Guard kag militia ang pila ka Filipino vessels sa exclusive economic zone (EEZ) sa West Philippine Sea sa tatlo ka separado nga insidente sa sulod sang duha ka bulan.
Ang presensya sang foreign vessels nga indi consistent sa Article 19 sang United Nations Convention on the Law of the Sea (UNCLOS) ang wala nagasanto sa interes sang Pilipinas.
Ginpasigurado naman sang DFA nga ang ila papel sa pagpabilin sang interes kag pahatag sang proteksyon kag pagpabilin sang national security kag territorial integrity ang magapabilin nga mabaskog.
