ILOILO CITY – Ginaduso sang Department of Social Welfare and Development (DSWD) sa incoming Marcos Jr. administration nga himuon nga prayoridad ang pag-implementar sang mga tikang agud nga mapunggan ang teenage pregnancy kadungan sang pag-implementar sang Universal Health Care law.
Ini ang gin-apelar ni DSWD Assistant Secretary Joseline Niwane sa una nga adlaw sang Duterte Legacy Summit.
Suno sa iya, ini ang makabig nga solusyon sang problema sa kapigaduhon.
Wala gintumod ni Niwane ang specific nga programa apang ang DSWD kag Commission on Population and Development ang may yara sang Social Protection program para sa Teenaged Mothers and their Children nga nagahatag sang suporta sang mga pamatan-on nga iloy kag sa ila kabataan lakip na ang pagbalik sa eskwelahan kag ang social amelioration program.
Suno pa sa iya, ang mga kabataan ang dapat nga magpabilin nga produktibo.
Magluwas sa teenage pregnancy, ang incoming administration ang dapat nga magpasigurado nga maayo ang implementasyon sang Universal Health Care law kag Conditional Cash Transfer (CCT) program nga nagahatag sang cash assistance sa pigado nga mga pamilya kabaylo sang pag-comply sang kondisyon nga naga-promote sang human development kaangay sang pagpa-eskwela sa mga kabataan kag pagtambong sang family development sessions.
