ILOILO CITY – Gina-review na sang Department of Justice (DOJ) ang drug cases batuk kay Senator Leila de Lima pagkatapos sang sunud-sunod nga pagbawi sang akusasyon sang mga witnesses.
Suno kay Justice Secretary Menardo Guevarra, ang pagbawi sang mga akusasyon sang mga witnesses ang dapat nga sa korte himuon.
Kinahanglan nga i-cross examine sa korte ang mga witnesses nga nagbawi sang akusasyon.
Apang suno kay Guevarra, ang tanan nga mga kaso ang gina-review sang DOJ gani bisan nga wala pa sang pagbawi sang statement, maabot gid ang punto nga ipaidalom man sang DOJ sa review ang kaso ni de Lima.
Sa subong, indi pa mahambal sang DOJ kun bala ano ang matuod kag ginpasigurado nga batunon man kun ano ang kamatuoran nga maggwa.
Kung matandaan, sang Abril, ang self-confessed drug lord nga si Kerwin Espinosa ang nagbawi sang iya alegasyon batuk kay de Lima nga ginsundan naman ni former Bureau of Corrections OIC Rafael Ragos kag amo man ang driver ni de Lima nga si Ronnie Dayan.
Ang pinakaulihi nga prosecution witness nga nagkambyo sang iya pahayag amo si Joel Capones.
Sang Myerkules naman, ang key government witness batuk kay Espinosa ang nagbawi man sang iya alegasyon batuk sa self-confessed drug lord amo man sa senadora.
Si de Lima ang preso sa PNP Headquarters sa Camp Crame bangud sang mga akusasyon may kaangtanan sa iligal nga droga nga gintawag niya nga “political persecution” ni Presidente Rodrigo Duterte.
Ang isa sa tatlo ka drug cases ang una na nga na-dismiss sang nagligad nga tuig.
