Ginpuhag sang panibag-o kag magkasunod nga mass shooting incidents ang duha ka estado sa Estados Unidos sang Amerika. .
Duha ka lalaki kag isa ka babayi ang patay matapos nga nagpangluthang ang pila ka mga suspek sa South Street entertainment district sa Philadelphia — sa area kun sa diin madamo sang mga bars kag restaurants. 12 man ang pilason sa amo nga insidente.
Sa isa ka separado nga shooting incident, tatlo ka tawo ang patay kag 14 ang pilason sa bar sa Chattanooga sa Tennessee.
Suno sa local authorities, duha sa napatay ang tuga sang pagkaigu sang bala kag ang isa nabungguan sang salakyan sang buot ini nga magpalagyo gikan sa lugar kun sa diin natabo ang pagpangluthang.
Ini nga mga insidente ang kasunod man sang pagpatay sang isa ka gunman sa apat ka mga persona sa isa ka ospital sa Tulsa, Oklahoma.
Sang nagligad lang nga semana, 21 man ang patay sang ginsulod sang suspek ang isa ka eskwelahan sa Texas.
Antes pa gid sini, may isa man ka 18-anyos nga lalaki nga nagluthang-patay man sa 10 ka Black people sa racist attack sa isa ka supermarket sa Buffalo, New York.
Sa rekord sang Gun Violence Archive, isa ka nonprofit research group, ginapahayag nga may 240 na ka mass shootings ang natabo sa Estados Unidos subong nga tuig.
Yari ang apelar ni US President Joe Biden — hingyo sa mga mamalidha sa pungsod nga aktuhan na ang nagalala nga gun violence sa Estados Unidos nga rason sang kamatayon sang madamo nga mga tawo sa nagakatabo nga masaker sa nanuhay-tuhay nga mga estado.
