Posible nga mangin available na ang tag-P20 nga kilo sang bugas sa temprano nga bahin sang tuig 2023 KUN pamatian ni president-elect Ferdinand Bongbong Marcos Jr. ang proposal sang Department of Agrarian Reform (DAR).
Matandaan nga sang tion pa lang sang pagpangampanya, nagpasalig na si Marcos nga panubuan sini tubtub sa P20 per kilo ang presyo sang bugas sa pungsod.
Suno naman kay DAR Secretary Bernie Cruz, nagalaum siya nga ma-discuss niya kay Marcos ang iya nga proposal, upod man sa iban nga government agencies kag local government units.
Kun mahimo ini suno kay Cruz, sigurado siya nga may guidelines na sa sulod pa lang sang anum ka bulan.
Posible suno kay Cruz ang P20 nga presyo paagi sa mega farm project nga ginaduso sang DAR.
Ang plano amo nga tipunon ang magagmay nga mga uma kag himuon nga mega farms sa tuyo nga may yara sang mass production sang bugas.
Kun nakaumpisa na ang mega farm suno kay Cruz, signal man ini sang intervention sang national government paagi sa paghatag sang pondo sa irrigation, farm-to-market roads, potable water supply, warehouses kag storage facilities, greenhouses, input kag product distribution sources.
Ginpaathag naman ni DAR Undersecretary David Erro nga plano nila ang pag-mechanize sang malapad nga mga ektarya sang duta agud nga may daku man nga ani para man sa food security kag bastante nga income sang mga mangunguma.
Ang programa suno kay Erro amo ang PBBM Programang Benteng Bigas para sa Mamamayan.
Ang prototype sini amo ang 150,000 hectares nga rice land.
Kun ma-fully mechanize ang 150,000 hectares sang duta, ginalauman nga mapakaon sang tag-P20 nga bugas ang nine million ka mga tawo.
Gin-cite man ni Erro ang data sa National Irrigation Administration kun sa diin ginapahayag nga may 1.2 million hectares sang irrigated lands sa pungsod kag kalabanan ang yara sa Central Luzon kag Cagayan Valley.
