ILOILO CITY- Nagpaandam ang gobyerno sang United Arab Emirates sa mga pumuluyo sa pagsunod sa anti-COVID measures kalakip na ang pagsuksok sang face masks ukon mahimo sila mangatubang sang mabug-at nga penalidad, kasunod sang doble nga pagtimbuok sang kaso sang COVID-19 sa sulod sang isa ka semana.
Suno kay Bombo International Correspondent Evangeline Perez Espinosa direkta sa UAE, ginapangabay man sang gulf state ang mga tawo nga nagpositibo sa test nga magsunod gid sa isolation rules ilabi pa nga nagataas man ang hospitalization rates.
Pahayag ni Espinosa,base sa data,ang daily recorded cases nagsaka sa 1,356 sang nagligad nga adlaw gikan sa 572 ka kaso sang nagligad nga semana.
Suno kay Espinosa, ang sin- o man nga madakpan nga wala nagasuksok sang face masks sa closed areas ang mahimo magpangatubang sang multa nga 3,000 dirhams ($816) ukon masobra sa P40,000.
