Kritikal ang kondisyon sang isa ka Filipino lawyer matapos nga naluthangan ini samtang yara sa Philadelphia, Pennsylvania, USA.
Ang biktima amo si Atty. John Albert Laylo, 35, residente sang Makati City.
Natabo ang insidente samtang nagasakay ang abogado sa isa ka Uber vehicle kaupod ang iya nga iloy kag tuyo kuntani nga magbisita sa pantyon sang iya lolo sa Chicago, Illinois.
Naigu sang bala ang ulo ni Laylo, samtang gindala man ang iloy sa ospital matapos nga napilasan sang nabuka ang bintana sang salakyan.
Tubtub subong, wala pa nakilal-an kun sin-o ang suspek.
Una nga nag-guwa ang mga pahayag nga napatay na ang amo nga biktima apang suno sa utod sini, may five percent pa ini nga mabuhi.
Ginpahayag nga naga-bato pa ang biktima kag wala pa gin-pronounce nga brain dead.
Nagapakig-angot na subong ang pamilya sa kaiping mga mga establishemento agud nga makakuha sang surveillance footage sa lugar kun sa diin natabo ang shooting.
Ginapakig-angutan man ang embahada sang Pilipinas para sa bulig sa imbestigasyon.
Hunyo 1 sang nagbiya si Laylo sa Pilipinas agud magbisita sa iya nga mga himata sa US kag Hulyo 2 pa kuntani ini plano nga magpauli sa pungsod.
