Ginpangsirado ang mga eskwelahan kag ginpa-untat ang non-essential government services sa Sri Lanka agud nga matipid ang ginakulang na nga suplay sang gatong.
Skeleton staff lang ang ginpatrabaho sa state offices bilang kabahin sang plano sang gobyerno nga buhinan ang pag-commute sang mga tawo kag matipid ang petrol kag diesel.
Nagapadayon naman ang operasyon sang mga ospital kag seaport sa Colombo, kapital sang pungsod.
Ginatos naman tubtub linibo ka mga motorista ang nagpila agud magpatughong sang salakyan apisar nga nag-anunsyo ang energy ministry nga may suplay pa sang gatong tubtub sa tatlo ka adlaw.
Ini ang gintawag pinakamalala nga economic crisis sa pungsod matapos nga nawad-an sang dollars agud nga ma-finance pati ang pinaka-importante nga imports lakip na ang fuel.
Sang Abril, napaslawan ang Sri Lanka nga bayaran ang $51 billion ukon ang P2.7 trillion nga utang sa iban nga mga pungsod.
Sa subong, na-umpisahan naman sang pungsod ang pagpakig-istorya sa International Monetary Fund para sa bailout request ukon ang paghatag sang financial assistance sa isa ka ekonomiya agud nga maluwas ini gikan sa pag-collapse.
