Masobra sa 100 ka kaso sang dengue ang nagdugang sa probinsya sang Iloilo sa sulod lang sang isa ka semana.
Sandig sa latest nga rekord sang Iloilo Provincial Health Office, may yara na sang 568 ka dengue cases sa probinsya as of June 18, mas mataas sang 108 sa 460 nga na-rekord sang nagligad nga Hunyo 11.
Sa sini nga numero, nagapabilin nga anum ang patay.
Yari ang mga gintumod nga banwa nga may pinakadamo nga mga kaso: San Joaquin nga may 118; Guimbal nga may 57; Tubungan nga may 52; Miagao nga may 34; Oton nga may 25; Estancia nga may 24; Dumangas nga may 20; Pototan kag Tigbauan nga may 19; Duenas nga may 15; kag Balasan kag Leon nga may tag-12.
Napabilin naman sang Anilao kag San Rafael ang rekord nga may zero case sang dengue sa sini nga tuig.
Ang San Joaquin ang una na nga naka-deklarar sang state of calamity bangud sa pagtimbuok sang kaso — tuman kalayo sa sitwasyon sang 2021, kun sa diin sa kaangay man nga June 18 nga morbidity week, isa lang ka kaso ang narekord sa amo nga banwa.
Sa interview sang Bombo Radyo kay Jennifer Joy O ate, health education promotion officer II sang Iloilo Provincial Health Office, liwat ini nga nagpahanumdom sa publiko sang simple nga pagpaninlo nga amo gid ang makabulig agud indi na madugangan ang dengue cases sa Iloilo.
Sang Hunyo 17, gin-umpisahan sang Iloilo Provincial Government ang cleanup kag clearing operation batok sa dengue kag baha, kag ginalauman nga mapadayon ini sang mga residente.
Sang 2019, matandaan nga nag-deklarar ang Iloilo sang dengue outbreak.
Sang amo nga outbreak, na-rekord ang peak sang dengue cases sa bulan sang Hulyo.
