ILOILO CITY- Padayon pa nga gina-imbestigaran sang otoridad ang kamatayon sang isa ka Overseas Filipino Worker(OFW) sa HongKong.
Suno kay Bombo International Correspondent Jing Gabiazon,direkta sa HongKong, nakit-an ang domestic helper sa sulod sang iya kwarto sa balay sang iya employer sa Sea View Villas, Sai Kung.
Ginpahayag ni Gabiazon nga wala pa ginpagwa ang pangalan sang biktima apang ini ang nagaedad sang 48 anyos.
Dugang ni Gabiazon nga nagtawag sa pulis ang employer sang amo nga Pinay sa emergency number kag gin report nga nakit-an nga wala sang pangalibutan ang OFW kag pag-abot sang otoridad, nakumpirma nga wala na ini sang kabuhi.
Padayon man nga nagapakig-angot ang Overseas Workers Welfare Administration (OWWA) sa otoridad sa Hong Kong.
