ILOILO CITY – Ginalauman nga magatambong si President Ferdinand “Bongbong” Marcos Jr. sa United Nations General Assembly sa New York sa Setyembre sa diin, maga-deliver ini sang speech.
Ini ang suno kay Philippine Ambassador to Washington Jose Manuel Romualdez.
Posible nga may yara sang side meeting upod kay US President Joe Biden apang suno kay Romualdez, mas gusto niya nga may yara sang patigayunon nga separado nga inaugural bilateral summit sa tunga ni Marcos kag sang American leader subong nga tuig sa Washington, D.C.
Magluwas sini, posible man nga may yara man sang bilateral meetings upod sa iban nga lideres sa United Nations General Assembly nga suno kay Romualdez, isa ka importante nga okasyon.
Suno kay Romualdez, kasunod sang inagurasyon kay Marcos bilang ika-17 nga presidente sang pungsod, madamo sang tawo ang interesado nga mabatian, makita kag makilala siya.
Amo ini ang rason kun ngaa nga antes pa man ang eleksyon, ginpahayag niya kay Marcos nga nagalaum siya nga ang una niya nga mga trips sa Western world amo sa United Nations.
Dugang pa niya, dako ang posibilidad nga maka-deliver sang speech si Marcos sa UN assembly bilang presidente sang Pilipinas sa una nga bahin sang duha ka semana nga pagsinapol.
Natalana man nga magtambong sang education summit sa New York si Vice President Sara Duterte sa Setyembre antes pa man ang UN Assembly.
Kung madumduman, nagapangatubang sang dako nga legal issue sa Estados Unidos si Marcos kun sa diin, ang isa ka district court ang nag-akusar sa iya kag sa iya iloy bangud sang paglapas sang court injunction.
Apang suno kay US Deputy Secretary of State Wendy Sherman, may yara sang immunity bilang presidente si Marcos kag mahimo nga magpadulong sa Estados Unidos.
Samtang, suno kay Romualdez, wala pa sang pat-ud nga petsa sang bilateral meeting ni Marcos kay Biden sa White House apang ginalauman nga madayon antes magtakop ang tuig ukon antes ang Nobyembre.
Una na nga nagpadala sang imbitasyon si Biden kag Marcos nga magbisita sa Washington.
