Indi maghalin ang Sri Lankan protesters sa sulod sang puluy-an sang ila nga presidente kag prime minister tubtub wala sang opisyal nga kumpirmasyon nga naka-resign na sa pwesto ang duha ka mataas nga opisyal sang pungsod.
Una na nga nagpahayag si President Gotabaya Rajapaksa nga manaog ini sa puwesto sa Hulyo 13, sandig sa anunsyo sang speaker sang parliament.
Wala sang public statement nagikan sa presidente apang may military sources nga nagsiling nga yara siya subong sa Navy vessel sa kalalawran nga sakop pa sang Sri Lanka.
Ang iya utod nga si former Prime Minister Mahinda Rajapaksa ang yara man sa naval base sa amo nga pungsod.
Matandaan nga linibo ka mga residente ang nagsulong sa official residences sang duha agud piliton nga manaog sila sa puwesto. Ang presidente ang ginabasol sa economic mismanagement sa pungsod ang amo ang rason kun ngaa ginakulang ang pagkaon, gatong, kag bulong sa pila na ka bulan.
Ang current Prime Minister nga si Ranil Wickremesinghe ang nagpahayag man nga maga-resign ini matapos nga ginsunog sang mga tawo ang iya private residence.
Sa subong, okupado sang protesters ang balay sang presidente.
Pila sa mga video kag laragway ang nagapakita nga naga-enjoy ang mga tawo sa swimming pool, nagahigda sa kama, nagahigda-higda sa well-manicured gardens, naga-work out sa gym, kag nagalantaw sang telebisyon kun sa diin ginapaguwa man ang footage sang kaangay nila nga mga protesters.
May yara man sang local reports nga nagapahayag nga nakakita ang anti-government protesters sang millions of rupees sa sulod sang mansion sang presidente.
Sa bahin sang Vatican, nagpanawagan na si Pope Francis para sa kalinong sa Sri Lanka sa tunga sang nagalala nga economic crisis.
