Wala pa nabaton sang mga Pinoy sa Sri Lanka ang 300 US dollars ukon malapit P17,000 nga ginpromisa sang Philippine government nga ihatag sa tunga sang nagalala nga krisis sa ekonomiya.
Mayo sini nga tuig sang nagpasalig ang Department of Foreign Affairs (DFA) nga ihatag ang assistance bangud sang pagtimbuok sa presyo sang mga balaklon sa amo nga pungsod.
Kulang ang foreign currency reserves sa Sri Lanka; wala sang inugbayad sa utang rason nga ginakulang man sang suplay sang bulong, pagkaon, gatong, kag iban pa nga kinahanglanon.
May yara man anay sang gintanyag nga repatriation assistance ang gobyerno sang Pilipinas para sa ginabanta 700 ka mga Pinoy sa amo nga pungsod apang wala pa sang ginmandu nga evacuation.
Suno kay Bombo International Correspondent Priscilla Rollo Wijesooriya direkta sa Kandy, isa ka daku nga syudad sa central Sri Lanka, daku gid nga bulig sa mga Pilipino kun mabaton na ang cash assistance bangud tuman ang pagpamigado subong sa ila nga lugar.
Sa subong, ginsulit sang DFA ang pahayag nga maga-coordinate ini sa Philippine Honorary Consul General sa Colombo (capital sang Sri Lanka) agud nga ma-provide ang anuman nga assistance sa mga Pinoy nga pinaka-apektado sang economic crisis.
Kadungan sini, ginpasaka man sang DFA ang crisis alert level sa Alert Level 2; buot silingon, wala sang overseas Filipino worker nga i-deploy sa amo nga South Asian country magluwas lang sa may yara sang existing contracts.
Madumduman nga nagtal-as ang anay presidente nga si Gotabaya Rajapaksa kag kun madumduman, sa kaakig sang mga residente sa iya kag sa iya administrasyon, ginpangsulod nila ang presidential palace.
Madumduman man nga ginsunog man sang Sri Lankan protesters ang puluy-an sang ila nga prime minister.
