Apisar sang malala nga krisis nga ginapangatubang sa Sri Lanka kag sa bag-o nga administrasyon nga wala pa sang kapat-uran kun may maayo nga idulot sa mga pumuluyo, nag-desisyon ang iban nga mga Pinoy nga magpabilin lang anay sa amo nga pungsod.
Suno kay Bombo International Correspondent Priscilla Rollo Wijesooriya direkta sa Kandy, isa ka syudad sa central Sri Lanka, may pamilya na ang iban sa ila sa amo nga pungsod rason nga indi mabayaan ang mga kabataan kag ang ila nga mga puluy-an.
Kun magpauli sa Pilipinas suno kay Wijesooriya, pat-od nga problema man gihapon kun ano ang bag-o nga palangabuhian.
Pangabay sini sa pamilya kag mga abyan sa Pilipinas, kuntani, may financial kag emotional support nga ihatag sa ila mga himata sa Sri Lanka.
“Napakalungkot. Hirap na hirap ang sitwasyon namin ngayon. Sa mga kababayan natin na may mga pamilya dito sa Sri Lanka, kumustahin po natin. Kung kailangan nila ng financial na tulong, bigyan po natin dahil halos lahat dito nahihirapan,” suno kay Wijesooriya.
Sa subong suno kay Wijesooriya, wala pa sang pagbag-o sa sitwasyon bangud asud-asud sa gihapon ang power blackouts, kakulang sa produktong-petrolyo, kakulang sa pagkaon, kag tuman ka taas nga presyo sang mga balaklon.
Halin sang gin-report nga tuman na kalawig ang pila sang mga tawo sa gasoline station, nagdangat na sa 13 ang napatay samtang nagalinya agud nga makakuha sa gatong.
Ang latest nga napatay amo ang 60-anyos nga lalaki nga nasapwan na lang nga wala na sang kabuhi sa sulod sang iya nga salakyan samtang nagahulat ini sa iya nga turno nga makapatughong.
May iban man suno kay Wijesooriya nga nagakawad-an na sang pasensya bangud indi lang inoras ang ila nga pag-pila kundi inadlaw. Ini ang rason suno sa iya nga may mga driver nga nagabato na sa pulis kag nagadangat pa sa pisikal nga away sang iban nga nagalinya.
Sa bahin sang Department of Foreign Affairs (DFA), nagpahayag ang ahensya nga ginaplano nga i-repatriate ang masobra 100 ka Pinoy sa Sri Lanka sa tunga sang nagapadayon nga political kag economic crisis.
Ginapahayag nga 115 sa ginabanta 700 ka Pinoy sa Sri Lanka ang nagpalab-ot na sang kagustuhan nga makapauli sa Pilipinas. ##
