ILOILO CITY – Nagpasalig ang World Health Organization (WHO) nga magahatag sila sang suporta sa Department of Health (DOH) matapos nga na-detect ang pinakauna nga kaso sang monkeypox.
Suno kay WHO Philippines Officer-in-Charge Dr. Graham Harrison, ang organisasyon ang magapadayon sa pagtrabaho upod ang DOH agud nga maghatag sang suporta sa pagpatuman sang national policies kag mga plano.
Kung madumduman, ginpahayag ni Health Undersecretary Dr. Beverly Ho nga ang una nga kaso sang monkeypox sa pungsod amo ang 31 anyos nga pasyente nga may travel history sa pungsod nga may kaso sang monkeypox.
May yara sang 10 ka mga close contacts nga kaupod sang pasyente sa sulod sang ila nga balay.
Una naman nga gindeklarar sang WHO nga isa ka global health emergency ang monkeypox outbreak.
Ang outbreak ang nag-apekto sa 15,800 ka mga tawo nagikan sa 72 ka pungsod suno sa US Centers for Disease Control and Prevention (CDC).
Sang Mayo, ang pagtimbu-ok sang kaso sang monkeypox ang gin-report sa gwa sang West kag Central African countries kun sa diin, ang balatian ang nangin endemic.
Ang una nga sintomas sang monkeypox amo ang hilanat, sakit sa ulo, muscle pain, sakit sa likod sa sulod sang lima ka adlaw.
Dason nga matuhaw ang rashes sa nawong, sa palad kag dapa-dapa sa tiil.
Ginpahayag na sang DOH nga nagapadayon na ang discussion sa United States government agud nga maka-secure sang bakuna para diri.
Apang ginklaro nila nga pili gid lamang ang makabaton sini.
