ILOILO CITY – Magapatigayon ang Taiwan sang live-fire military drills subong nga semana nga maga-simulate sang depensa sa isla batuk sa Chinese invasion kadungan sang pagpatigayon man sang Beijing sang fresh exercises sa palibot.
Ang self-ruled, democratic island ang nagapangatubang sang masami nga pamahog sang pagsakop sang China.
Nahibaluan nga ginapahayag sang China nga bawion nila pinaagi sa paggamit sang pwersa kun kinahanglan.
Ang pwersa sa isla ang magapatigayon sang anti-landing exercises sa southernmost county sang Pingtung subong nga adlaw kag sa Huwebes.
Suno kay Lou Woei-jye, spokesman sang Eighth Army Corps, maga-practice sang counter moves ang Taiwan batuk sa pagpang-atake sang kasumpong.
Maga-deploy sila sang ginatos ka tropa kag ginabanta 40 ka howitzer guns.
Ang Beijing ang padayon nga nagapatigayon sang joint air and sea drills pagkatapos sang pagbisita ni US House Speaker Nancy Pelosi sa Taipei sang nagligad nga semana apisar sang panawagan nga untaton na ang military exercises sa palibot sang isla.
Suno pa kay Lou, ang Taiwanese drills ang naka-schedule na kag indi pagpatigayunon bilang balos sa exercises sang China.
Ang isla ang masami nga nagapatigayon sang military drills bilang pagpanghanda sa posible pagpang-atake sang China kag sang nagligad nga bulan, nag-practice man sila sang repelling attacks nagikan sa dagat sa isa ka “joint interception operation” bilang kabahin sang pinakadako nga annual exercises.
Ang pinakaulihi nga war games ang ginpatigayon matapos nga gin-akusaran ang China nga naga-simulate sang pag-block kag pagpang-atake sang Taiwan sa mga drills sini sang nagliligad nga mga inadlaw.
Ang amo nga mga drills ang ginalauman nga magatakop sa Domingo apang ang China ang nagpahayag nga magapadayon ang ila drill sa Lunes.
