ILOILO CITY – Isa ang patay samtang madamo ang pilason matapos ang sunud-sunod nga pagsigabong sa Russian military airbase sa annexed Ukrainian peninsula sang Crimea.
Suno sa Russian defense ministry, ang pagsigabong ang tuga sang detonated aviation ammunition.
Sa statement, madamo sang aviation munitions ang naglupok sa airfield ‘Saki’ malapit sa Novofedorivka
Una na nga ginpahayag ni Kоnstantin Skorupsky sang Minister of Health sang Republic of Crimea, lima ang napilasan bangud sang pagsigabong apang indi pa klaro kun bala ang isa nga napatay ang kabahin sang mga gin-report nga napilasan.
Ang Crimea ang ginkabig sang Russia nga kabahin sang ila teritoryo sang 2014 nga nagasugpon sa Ukraine.
Wala ini ginakabig sang Kyiv kag sang ila nga mga kaalyado sa baylo, ginakabig nila ang peninsula Ukrainian territory nga yara sa idalom sang Russian occupation.
Suno naman kay Oleg Kryuchkov, adviser sang pinuno sang Crimean region, ginabanta 30 ka mga tawo nga nagapuyo malapit sa village sang Novofedorivka ang gin-evacuate halin sa ila mga balay.
Wala pa nakahatag sang statement ang Ukraine sang posible pagpang-atake.
Ang pagsigabong ang natabo pila ka oras matapos ang ginlunsyar nga strike sang Ukrainian military sa Russian occupied regions sa southern Ukraine malapit sa Crimean peninsula.
