ILOILO CITY – Naglunsyar ang China sang military drills sa palibot sang Taiwan kadungan sang pagbisita sang United States lawmakers sa amo nga pungsod, isa ka semana pagkatapos sang pagbisita man ni House Speaker Nancy Pelosi nga nagpataas pa sang tension.
Ang duha ka adlaw nga trip sang mga mamalidha ang natabo pagkatapos nga nagpadala sang warships, missiles kag jets ang Beijing sa kadagatan kag kahawaan sa palibot sang Taiwan, isa ka self-ruled democracy nga ginatuyo nga sakupon sang China.
Ang five-member congressional delegation nga ginapamunuan ni Senator Ed Markey sang Massachusetts ang nagsapol kay President Tsai Ing-wen.
Magatutok sa trade, regional security kag climate change ang pagbisita sang delegation.
Suno kay Shi Yi, spokesperson sang Chinese military Eastern Theater Command, ang military drill ang magapugong sa US kag Taiwan sa padayon nga political tricks nga nagaguba sang peace and stability sa Taiwan Strait.
Nahibaluan nga gin-akusaran sang Taiwan ang Beijing nga ginagamit lamang ang pagbisita ni Pelosi bilang excuse agud nga magpatigayon sang drill bilang pagpanghanda sa invasion.
Ang communist party ang wala pa nakapamuno sa Taiwan apang nagaplano nga sakupon ang isla kag gamitan sang pwersa kun kinahanglan.
