ILOILO CITY – Ginbalabagan sang Bureau of Customs (BOC) ang karga sang barko nga MV Bangpakaew matapos nga nagdiskarga ini sa Subic sang sinako nga refined sugar nagikan sa Thailand.
Karga sang barko ang 7,000 metric tons ukon 140,000 ka bag sang kalamay.
Sa report nga nabaton ni Executive Secretary Vic Rodriguez nagikan kay Customs Commissioner Yogi Filemon Ruiz, “recycled” ang import documents nga ginpakita sang barko.
Gina-imbestigaran na ini sang BOC kasunod sang pagpasangkad pa sang kampanya sang gobyerno batuk sa iligal nga pag-import sang agricultural products kaangay sang kalamay.
Nagapadayon man subong ang inspection sa mga warehouses sang kalamay.
Sang nagliligad nga mga inadlaw sa magkatuhay nga inspeksyon sang Customs Intelligence and Investigation Service (CIIS) and Enforcement and Security Service (ESS)-Quick Reaction Team sa Bulacan, masobra sa 70, 000 ka mga sako sang kalamay ang nakita sang otoridad.
Sa Pampanga, isa ka warehouse ang ginasuspetsahan nga naga-hoard sang kalamay nga nagikan sa Thailand.
