21 ang kumpirmado nga patay sa 30 ka oras nga hostage-taking nga ginpatigayon sang armado nga mga suspek sa isa ka hotel sa Somalia.
Suno sa Somali security forces, yara naman sa 106 ka mga tawo ang natigayon nga ma-rescue.
Gin-ako naman sang Islamist militant group nga al-Shabab nga sila ang responsable sa amo nga pagpang-atake. Affiliate sang al-Qaeda ang al-Shabab kag madugay na nga nagapamatok sa federal government.
Suno sa pulis, nag-gamit ang mga suspek sang duha ka car bomb kag explosives agud makasulod sa Hayat Hotel sa Mogadishu.
Ginakahangaw-an man nga magtaas pa ang numero sang mga patay bangud posible nga nahakot na sang mga pamilya ang bangkay sang ila mga himata antes pa man ginsuguran ang official count sa mga biktima.
117 man ka tawo ang injured kag 15 ang yara sa critical condition.
Tuman man ka dako ang halit sa hotel bangud sa away nga natabo sa tunga sang militante kag sang pwersa sang gobyerno.
Ini ang una nga pagpang-atake sang al-Shabab halin sang nagpungko sa pwesto sang Mayo ang bag-o nga presidente sang Somalia nga si Hassan Sheikh Mohamud. ##
