Mas manubo ang numero sang krimen nga natabo sa Western Visayas sa una nga walo ka bulan subong nga tuig ipaanggid sa amo man nga period sang 2021.
Sa rekord sang Police Regional Office 6, nakit-an nga halin sa 7, 924 cases nga narekord sang nagligad nga tuig, nagnubo ini sa 7, 045 subong nga tuig. Sa Peace and Order indicator, nakasaad nga 11.09 percent ang decrease ukon katumbas sang 879 incidents.
May pagnubo nga na-rekord sa tanan nga probinsya kag syudad sa rehiyon magluwas lang sa Negros Occidental.
Ang Iloilo City ang may pinakamataas nga decrease nga 33.1 percent ukon 478 cases (halin sa 1, 444 sang 2021 nga nagpanaog sa 966 subong nga tuig); ginasundan sang Iloilo Province nga may decline nga 16.67 percent ukon 312 cases (halin sa 1, 871 sang 2021 nga nagpanaog sa 1, 559 subong nga tuig); kag Guimaras nga may decrease nga 10.22 percent ukon 23 cases (halin sa 225 nga nagnubo sa 202 subong nga tuig).
Sa Negros Occidental naman, may nakit-an nga increase sang 81 cases ukon 4.34 percent (halin sa 1, 866 sang 2021 nga nagsaka gamay sa 1, 947 subong nga tuig).
Sa interview sang Bombo Radyo kay Pol. Lt. Col. Arnel Solis, spokesperson sang Police Regional Office 6, iya ginpahayag nga pamatuod ini sang pagbinuligay sang mga pulis, force multipliers, kag local government units pag-abot sa crime-prevention efforts.
Ginalauman nga mas mapaayo pa ini nga rekord paagi sa maayo nga kaangtanan sang LGU, pulis, kag publiko. ##
