ILOILO CITY – Indi magtambong si Pope Francis sa state funeral ni Queen Elizabeth II sa London sa masunod nga semana.
Septyembre 8 sang napatay ang reyna sa edad nga 96, kag ilubong siya sa Westminster Abbey sa September 19.
Sa official statement sang Vatican, ipadala sang santo papa ang iya de-facto foreign minister nga si The Most Reverend Paul Gallagher, ang secretary for relations with states and international organizations.
Nahibaluan nga ginatos nga foreign royals kag leaders ang ginalauman nga magtambong sang state funeral sang reyna nga isa sa pinakadako nga diplomatic gatherings matapos ang pila ka dekada.
Ang Westminster Abbey ang may yara sang lugar para sa 2, 000 ka mga tawo, gani, ang mga heads of state kag isa ukon duha ka mga guests ang gin-imbitar.
Anum ka mga pungsod ang indi imbitado sa lubong ni Queen Elizabeth II, ang longest ruling monarch sa maragtas sang Britanya.
Sa inisyal nga report, indi makabaton sang imbitasyon ang Russia, Belarus, Myanmar, Venezuela, Syria, kag Afghanistan.
Ginpatigayon ini nga tikang samtang ginakonsiderar ang current political climate kag ang relasyon sang United Kingdom sa sini nga mga pungsod.
Antes sini, ginpakamalaot na sang UK kag sang iban nga Western Countries ang Russia bangud sa pag-invade sini sa Ukraine. Halangpon nga wala gin-imbitar si Russian President Vladimir Putin.
Wala man ang Belarus bangud kaalyado ini sang Russia.
Wala naman sang diplomatic relationship ang UK sa Syria kag Venezuela, samtang wala man ginlakip ang Afghanistan kag Syria bangud sang mainit nga political situations.
May ginpadala nga mga imbitasyon sa North Korea, Nicaragua, kag Iran apang yara lang sa ambassadorial level; buot silingon, indi imbitado ang head of the states.
Ginapahayag nga may pila naman ka world leaders nga nagkumpirma sang attendance kaangay kanday United States President Joe Biden, Justin Trudeau sang Canada kag Emmanuel Macron sang France.
