ILOILO CITY- Magadihon ang Committee on Agriculture sa Sangguniang Panlalawigan sang isa ka ordinansa agud nga may yara sang ngipon ang Executive Order No. 460 ni Iloilo Governor Arthur Defensor Jr.
Matandaan nga nagpaguwa sang Executive Order si Governor Defensor nga nagamandu sa pagpatuman sang quarantine procedures kag disease prevention and control measures batuk sa African Swine Fever sa probinsya sang Iloilo.
Sa interview sang Bombo Radyo kay Iloilo 2nd District Board Member Rolito Cajilig, Chairman sang nasambit nga komitiba, iya ginpahayag nga nakabalay na siya sang provincial ordinance kag iya ini nga i-presentar sa masunod nga session sa Sangguniang Panlalawigan.
Ini ang may tigulo nga “An ordinance creating the provioncial task force and technical working group, and adopting and implementing the “Bantay ASF sa Barangay” or the “BABay ASF Program” in the province of Iloilo and providing powers thereof, and for other purposes”.
Suno kay Board Member Cajilig, lauman nga mahugtanay gid sang mga protocols sa banwa sang Oton bangud sa subong yara na sa 1km radius halin sa “ground zero” ang ginadumilian nga makapaguwa kag makapasulod sang baboy.
Plano man sang natungdan nga makapatawag sang committee hearing ukon inquiry agud hibaluon kun paano nasudlan sang African Swine Fever ang probinsya.
Ipatawag sini ang backyard raisers kag local government unit agud makolekta kag mahibaluan sang Sangguniang Panlalawigan kun pila ang may yara sang backyard farm.
Nagapakig-angot naman si Board Member Cajilig sa Iloilo Provincial Veterinary Office agud makakuha sang update sa sitwasyon sa banwa sang Oton ilabi na sa mga apektado sang 1km radius halin sa “ground zero”.
