Nakahanda si Negros Oriental Rep. Arnolfo ‘Arnie’ Teves Jr. nga magbalik sa Pilipinas agud atubangon ang mga akusasyon batok sa iya kasunod sang Degamo assassination, apang ginpahayag sang iya legal team nga ang pinakadaku nga concern subong amo ang iya seguridad.
Suno sa legal counsel nga si Atty. Ferdinand Topacio, “Definitely, he intends to return to clear his name… However, in light of recent developments where the rights, not [just] of Cong. Teves but of others associated with him were trampled upon, may malaking concern na sa security niya.”
Amo man sini ang statement sang isa pa ka abogado nga si Atty. Toby Diokno — sigurado suno sa iya nga magabalik ang mamalidha apang ang pamangkot amo ang petsa kun san-o ini dapat magpauli sa Pilipinas.
“We just have to secure his safety and the safety of his family before he could really decide when to return. It’s just a matter of when. If he will return, yes, he will return. It’s just a matter of when,” suno kay Diokno.
Una na nga nagpanawagan si House Speaker Ferdinand Martin Romualdez kay Teves nga magbalik sa Pilipinas. Expired na ang authority to travel sini sa Estados Unidos sang Marso 9.
Si Teves ang gintudlo sang isa sa mga suspek sa Degamo slay case nga amo ang mastermind sa pagpapatay kay Negros Oriental Governor Roel Degamo.
Antes pa man nahingadlan, una na nagpanginwala si Teves nga may kahimuan siya kag ang iya pamilya sa amo nga krimen. ##
