Posible nga wala sang landong si Negros Oriental 3rd District Rep. Arnolfo ‘Arnie’ Teves Jr. nga ipakita sa Pilipinas subong nga adlaw nga amo ang deadline nga ginhatag sang Kamara agud nga mag-report na siya sa iya nga trabaho.
Suno sa legal counsel ni Teves nga si Atty. Ferdinand Topacio, nakabaton sila sang correspondence nga kinahanglan magpakita si Teves sa House Speaker’s Office sa Marso 20 kag ipaathag ang iya nga pag-absent apisar nga expired na ang iya travel authority sang Marso 9, apang suno sa iya, duda siya kun mapauli ang mamalidha bangud sa security concern.
Matandaan nga naghatag si House Speaker Martin Romualdez sang petsa nga Marso 20 agud nga magpauli na si Teves sa Pilipinas halin sa luwas sang pungsod. Naghingyo si Teves sang duha ka bulan nga leave of absence apang wala gin-grant.
Nahibaluan nga si Teves ang gintudlo sang isa sa mga suspek sa Degamo assassination nga amo ang mastermind sa pagpapatay kay Governor Roel Degamo sang Marso 4. Walo ka iban pa nga sibilyan ang nadalahig sa amo nga asasinasyon.
Sa Marso 22, natalana naman ang masunod nga preliminary investigation sa criminal complaints nga gin-file sang Criminal Investigation and Detection Group (CIDG) batok kay Teves kaangot sa pagkumpiska sang illegal firearms and explosives halin sa iya mga propiedad may kaangtanan sa ginapahayag kahilabtanan sini sa murder sang 2019.
Una na nga nagpahayag ang legal team ni Teves nga luyag man sini magpauli sa Pilipinas apang indi mahimo bangud sa kahangawa sa iya kaugalingon nga seguridad. ##
