Magapakig-kita sanday Foreign Affairs Secretary Enrique Manalo kag Defense officer in charge Carlito Galvez sa mga high-ranking officials sang Estados Unidos sang Amerika agud mapapag-on pa ang political kag military engagement sang Pilipinas kag Amerika.
Atubangon sang duha sa high-level ministerial meeting sa Washington sa Abril sanday US Secretary of State Anthony Blinken kag US Secretary of Defense Lloyd Austin.
Suno kay Philippine Ambassador to Washington Jose Manuel Romualdez, lakip sa madiskusyunan nga bilateral issues amo ang defense kag security cooperation kag ang dalagku nga mga development sa economic engagement sang duha ka pungsod.
Ang agenda suno kay Romualdez ang maga-cover sang regional kag global issues nga may epekto sa Pilipinas kag sa Estados Unidos sang Amerika.
Ginalauman nga malakip diri ang nagkalatabo sang damlag lang sa West Philippine Sea kun sa diin may serye sang ginapahayag Chinese harassment nga ginhimo batok sa mga manugpangisda nga Pinoy kag sa crew sang Philippine Coast Guard.
Lakip sa pinakatalalupangdon amo ang pagtaya sang Chinese Coast Guard sang military-grade laser sa Philippine supply vessel sa Ayungin Soal sang nagligad nga Pebrero 6.
Sa pihak nga bahin, ginpakigbahin man ni Romualdez nga posible sa masunod nga bulan na matumod kun san-o ang official ukon state visit ni President Bongbong Marcos sa Estados Unidos sang Amerika.
Ang state visit ni Marcos ang ginalauman nga maga-highlight sa mga tikang sang administrasyon agud nga mabalik ang mapag-on nga relasyon sang Pilipinas kag Amerika matapos nga nangin matahaw ini sa tion ni former President Rodrigo Duterte nga una na nagpahayag nga indi ini magtapak sa Estados Unidos. ##
